ஒரு எலெக்ட்ரிக் காரால் வீட்டுக்கு தேவையான மின்சாரத்தை வழங்க முடியுமா? ஃபோர்ட்-இன் இந்த காரால முடியும்!

இந்த உலகில் மின்சார வாகனங்களின் ஆதிக்கம் மெல்ல மெல்ல அதிகரித்துக் கொண்டே வருகின்றது. இதற்கு உலகளவில் மின் வாகன பயன்பாட்டை ஊக்குவிக்கும் வகையில் மேற்கொள்ளப்பட்டு வரும் நடவடிக்கைகளே முக்கிய காரணமாக அமைந்துள்ளது.

எலெக்ட்ரிக் வாகனங்கள் பல வகைகளில் அதிக பலனை வழங்குகின்றன. குறிப்பாக, சுற்றுச் சூழலுக்கு இது மாசை ஏற்படுத்தாது. மேலும், குறைந்த பராமரிப்பில் அதிக லாபத்தை வழங்கும். இதுபோன்ற எக்கச்சக்க காரணங்களினால் எலெக்ட்ரிக் வாகனங்களுக்கு உலக மக்கள் மத்தியில் மவுசு அதிகரித்துக் காணப்படுகின்றது.

அதிலும், அதிக தொழில்நுட்ப வசதிகளுடன் விற்பனைக்கு வரும் புதுமுக மின்சார வாகனங்களுக்கு டிமாண்ட் ஏகபோகமாக நிலவுகின்றது. அந்தவகையில், ஃபோர்டு (Ford) நிறுவனத்தின் புத்தம் புதிய தயாரிப்பான எஃப்-150 லைட்னிங் (F 150 Lightning) வாகனத்திற்கு மக்கள் மத்தியில் நல்ல மிக சிறப்பான வரவேற்புக் கிடைக்கத் தொடங்கியிருப்பதாக தகவல்கள் வெளியாகியுள்ளன.

இது ஓர் பிக்-அப் ட்ரக் ரக எலெக்ட்ரிக் வாகனமாகும். இந்த வாகனத்திற்கு அமெரிக்கர்கள் மத்தியில் மிக சிறப்பான ரெஸ்பான்ஸ் கிடைக்கத் தொடங்கியிருக்கின்றது. இக்காரின் முதல் பேட்ச் தற்போது டெலிவரிக்கு தயாராக இருக்கின்றன. இந்த நிலையில் இந்த எலெக்ட்ரிக் காரின் டாப் வேரியண்டில் இடம் பெற்றிருக்கும் சிறப்பு வசதி பற்றிய தகவல் வெளியாகி உலக மக்கள் அனைவரையும் ஆச்சரியத்தில் மூழ்க வைத்திருக்கின்றது.

ஃபோர்டு எஃப்-150 லைட்னிங் எலெக்ட்ரிக் பிக்-அப் ட்ரக்கின் உயர்நிலை வேரியண்ட், ஓர் வீட்டின் அனைத்து மின் விளக்குகளுக்கும் மூன்று நாட்கள் வரை மின்சார திறனை வழங்கக் கூடிய அளவிற்கு திறன்படைத்தது என்கிற தகவலே வெளியாகியுள்ளது. இந்த தகவலே ஒட்டுமொத்த மின் வாகன உலகையுமே ஆச்சரியத்தில் மூழ்க வைத்திருக்கின்றது.

இதுபோன்று இன்னும் பல அம்சங்களுடன் இக்கார் உருவாக்கப்பட்டிருக்கின்றது. ஆகையால், இதன் விலை சற்றே அதிகமானதாக காட்சியளிக்கின்றது. ஃபோர்டு எஃப்-150 லைட்னிங் எலெக்ட்ரிக் பிக்-அப் ட்ரக்கின் உயர்நிலை வேரியண்டிற்கு 72,474 அமெரிக்க டாலர்கள் விலை நிர்ணயிக்கப்பட்டுள்ளது.

அதேநேரத்தில் இந்த எலெக்ட்ரிக் காரின் ஆரம்ப நிலை வேரியண்ட் 40 ஆயிரம் அமெரிக்க டாலர்களுக்கு விற்பனைக்குக் கிடைக்கும். பேக்-அப் பவர் எனும் சிறப்பம்சத்தின் வாயிலாகவே மூன்று நாட்களுக்கு ஓர் வீட்டின் மின் விளக்குகளுக்கு மின்சார திறனை வழங்கும் வசதியை உயர்நிலை தேர்விற்கு ஃபோர்டு வழங்கியிருக்கின்றது.

இந்த சிறப்பு வசதிக்காக நிறுவனம் எலெக்ட்ரிக் பிக்-அப் ட்ரக்கில் 131 kWh பேட்டரி பைக்கை வழங்கியிருக்கின்றது. இந்த பேட்டரியானது சன்ரன், சோலார் கம்பெனியின் கூட்டணியின் வாயிலாக உருவாக்கப்பட்டிருக்கின்றது. இது 9.6 kW வரை பவரை வெளியேற்றும் திறன் கொண்டது.

இப்பேட்டரியை ஒரு முறை முழுமையாக சார்ஜ் செய்தால் 480 கிமீ வரை செல்லுவதற்கான மின்சார திறனை வழங்கும். இத்தகைய அதிகபட்ச ரேஞ்ஜ் திறனுடன் சேர்த்து பவர்-கட்டில் இருந்தும் இது நமக்கு விளக்களிக்கும். வாடிக்கையாளர் சன்ரன்ஸ்-இன் ஹோம் இன்டெக்ரேஷன் சிஸ்டத்தை இன்ஸ்டால் செய்ய வேண்டும். இன்வர்டர் மற்றும் டிரான்ஸ்ஃபர் சுவிட்சுடன் கூடிய பேட்டரி அமைப்பை இது கொண்டிருக்கும்.

இது வழிகளில் பவரை வழங்க உதவும். கூடுதலாக சோலார் பவரையும் ஆப்ஷனலாக ஃபோர்டு எஃப்-150 லைட்னிங் எலெக்ட்ரிக் பிக்-அப் ட்ரக் பயனர்களால் இன்ஸ்டால் செய்து கொள்ள முடியும். இது கூடுதல் சிறப்பு வசதியை வீட்டிற்கு வழங்க உதவும். குறிப்பாக, வீட்டை எப்போதும் மின்சார திறன் நிறைந்த இல்லமாக மாற்ற வழிவகுக்கும்.