2021 ஆண்டின் நாட்டின் சிறந்த கார் எது தெரியுமா?.. டாடா அல்ட்ராஸ் காரையே ஓரம் கட்டிய ஹூண்டாய் தயாரிப்பு!!

ஹூண்டாய் நிறுவனத்தின் புதுமுக கார்களில் ஐ20 காரும் ஒன்று. இந்த காரே 2021 ஆண்டின் இந்தியாவின் சிறந்த கார் என்ற விருதைத் தட்டிச் சென்றிருக்கின்றது. தற்போது விற்பனையில் சக்கைப்போடு போட்டுக் கொண்டிருக்கும் மஹிந்திரா தார், கியா சொனெட், ஹூண்டாய் க்ரெட்டா, ஹோண்டா சிட்டி மற்றும் டாடா அல்ட்ராஸ் உள்ளிட்ட கார்களை பின்னுக்கு தள்ளி இந்த விருதை அக்கார் பெற்றிருக்கின்றது.

இப்போட்டியில், மேற்கூறிய கார்கள் மட்டுமின்றி ஹூண்டாய் அவ்ரா, கியா கார்னிவல் மற்றும் எம்ஜி குளோஸ்டர் ஆகிய அதிக லக்சூரி வசதிகள் கொண்ட கார்களும் கலந்துக் கொண்டன என்பது குறிப்பிடத்தகுந்தது. இக்கார்களையே ஹூண்டாய் ஐ20 ஓரம் கட்டிவிட்டு 2021 ஆண்டிற்கான நாட்டின் சிறந்த கார் (Indian Car of the Year 2021) என்ற விருதை அது வென்றிருக்கின்றது.

ஹூண்டாய் நிறுவனம் புதிய ஐ20 காரை கடந்த ஆண்டு நவம்பர் மாதம் 5ம் தேதி அன்றே விற்பனைக்கு அறிமுகப்படுத்தியது. இது ஓர் பிரீமியம் தர ஹேட்ச்பேக் காராகும். இக்காரை கவர்ச்சியான ஸ்போர்ட்ஸ் ரக காரைப் போன்று வடிவமைத்திருக்கின்றது ஹூண்டாய். இத்துடன், எக்கச்சக்க சிறப்பு தொழில்நுட்பம் மற்றும் லக்சூரி அம்சங்களையும் வழங்கியிருக்கின்றது.

எல்இடி புரஜெக்டர் மின் விளக்கு, இசட் வடிவிலான எல்இடி டெயில்லேம்ப், 16 இன்சிலான டயமண்ட் கட் அலாய் வீல், 10.25 இன்சிலான எச்டி தொடு திரை இன்ஃபோடெயின்மென்ட் சிஸ்டம், ஆட்டோமேட்டிக் க்ளைமேட் கன்ட்ரோல், பன்முக கன்ட்ரோல்கள் கொண்ட ஸ்டியரிங் வீல், நீல நிற ஆம்பிசியன்ட் மின் விளக்கு மற்றும் எலெக்ட்ரிக் சன்ரூஃப் என எக்கசக்க சிறப்பு வசதிகள் இக்காரில் கொடுக்கப்பட்டிருக்கின்றன.

தொடர்ந்து, போஷ் நிறுவனத்தின் 7 ஸ்பீக்கர்கள் கொண்ட சவுண்ட் சிஸ்டம், கூலிங் பேட் வசதிக் கொண்ட ஒயர்லெஸ் சார்ஜர், ஸ்லைடிங் ஆர்ம்ரெஸ்ட், ப்ளூடூத் இணைப்பு வசதி, ஆக்ஸி பூஸ்டர் ஏர் ப்யூரிஃபையர், ஈகோ கோட்டிங், ஐஎம்டி, ஓடிஏ மேப் அப்டேட்டுகள், ஹில் அசிஸ்ட் கன்ட்ரோல், அவசரகால ஸ்டாப் மற்றும் டிபிஎம்எஸ் என எண்ணற்ற தொழில்நுட்ப வசதிகள் இக்காரில் கொடுக்கப்பட்டிருக்கின்றன.

புதிய ஹூண்டாய் ஐ20 கார் ஒட்டுமொத்தமாக மூன்று விதமான எஞ்ஜின் தேர்வுகளில் விற்பனைக்குக் கிடைக்கும். 83 பிஎஸ் மற்றும் 115 என்எம் டார்க்கை வெளியேற்றக் கூடிய 1.2 லிட்டர் கப்பா பெட்ரோல் எஞ்ஜின், 120 பிஎஸ் மற்றும் 172 என்எம் டார்க் திறனை வெளியேற்றக்கூடிய 1.0 லிட்டர் கப்பா டர்போ ஜிடிஐ பெட்ரோல் மற்றும் 100 பிஎஸ்-240 என்எம் டார்க்கை வெளியேற்றக் கூடிய 1.5 லிட்டர் யு2 சிஆர்டிஐ டீசல் எஞ்ஜின் என இந்த மூவிதமான தேர்வுகளியே கார் கிடைத்து வருகின்றது.

இதுதவிர மேக்னா, ஆஸ்தா, ஸ்போர்ட்ஸ் மற்றும் ஆஸ்தா (ஓ) ஆகிய நான்கு விதமான தேர்வுகளிலும் இக்கார் விற்பனைக்குக் கிடைத்து வருகின்றது. இதன் ஆரம்ப நிலை மாடலின் விலை ரூ. 6.80 லட்சம் ஆகும். இதன் அதிகபட்ச விலை ரூ. 11.33 லட்சம் ஆகும். இது டெல்லி எக்ஸ்-ஷோரூம் விலை என்பது குறிப்பிடத்தகுந்தது. இக்கார், இந்தியாவில் மாருதி பலினோ, டாடா அல்ட்ராஸ், டொயோட்டா க்ளான்ஸா, ஃபோக்வேகன் போலோ ஆகிய கார்களுக்கு கடுமையான போட்டியை வழங்கி வருகின்றது.